Sěrat Waosan Nayaka Lalana Bag : 4
| DESKRIPSI NASKAH | ||
| Judul | : | Sěrat Cariyos Nayaka Lalana |
| Tipe | : | Terbitan |
| A / B | : | Jawa / Jawa |
| Bentuk | : | Tembang |
| Ikhtisar | : | Mengisahkan perjalanan gerilya 4 menteri bersama rombongan selama 209 hari pada masa Agresi Militer II Yogyakarta. |
| BAGIAN | ||
| I | : | Sěrat Waosan Nayaka Lalana Bag : 1 |
| II | : | Sěrat Waosan Nayaka Lalana Bag : 2 |
| III | : | Sěrat Waosan Nayaka Lalana Bag : 3 |
| IV | : | Sěrat Waosan Nayaka Lalana Bag : 4 |
| V | : | Sěrat Waosan Nayaka Lalana Bag : 5 |
| VI | : | Sěrat Waosan Nayaka Lalana Bag : 6 TAMAT |
꧋ꦱꦼꦫꦠ꧀ꦮꦲꦺꦴꦱ꧀ꦱꦤ
꧋ꦤꦪꦏꦭꦭꦤ꧉
SĚRAT WAOSAN NAYAKA LALANA
SĚRAT WAOSAN NAYAKA LALANA
| ꧁꧂ | |
| ꧄ꦢꦤ꧀ꦝꦁꦒꦸꦭ꧄ | |
| ꧑ | ꧄ꦢꦸꦥꦶꦊꦉꦩ꧀ꦲꦶꦁꦢꦺꦴꦢꦺꦴꦭ꧀ꦱꦲꦫꦶ꧈ꦤꦸꦭꦶꦥꦿꦥ꧀ꦠꦥꦏ꧀ꦩꦶꦱ꧀ꦠꦼꦂꦱꦸꦤꦂꦪ꧈ꦤꦩꦸꦁꦥꦾꦩ꧀ꦧꦏ꧀ꦏꦤ꧀ꦭꦏꦸꦤꦺ꧈ꦥꦤꦶꦠꦿꦊꦁꦒꦃꦲꦶꦥꦸꦤ꧀꧈ꦱꦏꦶꦁꦏꦤꦪꦏꦤ꧀ꦄꦒꦩꦶ꧈ꦠ꧀ꦭꦸꦱꦸꦥ꧀ꦥꦤ꧀ꦤꦱꦏ꧀ꦢꦺꦱ꧈ꦩꦢꦺꦴꦱ꧀ꦱꦶꦥꦏ꧀ꦩꦱ꧀ꦏꦸꦂ꧈ꦮꦸꦱ꧀ꦢꦔꦸꦢꦺꦤ꧀ꦚꦔꦸꦥꦪ꧈ꦩꦼꦤ꧀ꦠꦿꦶꦤꦶꦫꦠꦤ꧀ꦱꦃꦠꦤ꧀ꦱꦒꦼꦢ꧀ꦥꦶꦤꦁꦒꦶꦃ꧈ꦩꦶꦭꦏꦭꦁꦏꦸꦁꦱꦸꦱꦃ꧉ |
| 1 | Dupi lěrěm ing Dodol saari/ nuli prapta Pak Mistěr Sunarya/ namung pyambakan lakuné/ panitra lěnggahipun/ saking kanayakan agami/ tlusupan nasak dèsa/ madosi Pak Maskur/ wus dangu dènnya ngupaya/ měntrinira tansah tan sagěd pinanggih/ mila kalangkung susah// |
| ꧒ | ꧄ꦲꦸꦒꦶꦏꦠꦺꦴꦤ꧀ꦥꦿꦥ꧀ꦠꦲꦤꦶꦭꦶꦏ꧀ꦏꦶ꧈ꦩꦶꦱ꧀ꦠꦼꦂꦏꦱ꧀ꦩꦤ꧀ꦪꦱꦶꦔꦢꦶꦩꦼꦗ꧈ꦕꦤ꧀ꦛꦱ꧀ꦫꦶꦔꦱ꧀ꦮꦶꦕꦫꦤꦺ꧈ꦥꦶꦝꦠꦺꦴꦉꦩꦼꦤ꧀ꦤꦶꦥꦸꦤ꧀꧈ꦲꦶꦔꦸꦠꦸꦱ꧀ꦩꦼꦤ꧀ꦠꦿꦶꦝꦭꦩ꧀ꦤꦼꦒꦿꦶ꧈ꦏꦼꦭꦶꦭꦶꦁꦲꦔꦸꦩ꧀ꦧꦫ꧈ꦲꦥꦫꦶꦁꦱꦼꦱꦸꦭꦸꦃ꧈ꦔꦤ꧀ꦠꦺꦴꦱ꧀ꦢꦸꦒꦶꦲꦶꦁꦔꦪꦺꦴꦒꦾ꧈ꦪꦼꦏ꧀ꦠꦶꦒꦶꦪꦠ꧀ꦢꦠꦤ꧀ꦢꦔꦸꦤꦸꦭꦾꦥꦩꦶꦠ꧀꧈ꦤꦸꦗꦸꦧꦺꦴꦗꦤꦼꦒꦫ꧉ |
| 2 | Ugi katon prapta aniliki/ Mistěr Kasman ya Singadiměja/ canṭas ringas wicarané/ piḍato rěměnipun/ ingutus měntri ḍalam něgri/ kěliling angumbara/ aparing sěsuluh/ ngantos dugi ing Ngayogya/ yěkti giyat datan dangu nulya pamit/ nuju Bojaněgara// |
| no. 3 tidak ada | |
| ꧔ | ꧄ꦏꦥꦶꦁꦏꦭꦶꦃꦏꦁꦥꦿꦥ꧀ꦠꦩꦁꦒꦶꦃꦲꦶ꧈ꦱꦩꦶꦏꦒꦺꦠ꧀ꦮꦶꦠ꧀ꦢꦠꦤ꧀ꦏꦶꦤꦶꦫ꧈ꦧꦸꦁꦠꦩꦭꦮꦤ꧀ꦏꦚ꧀ꦕꦤꦺ꧈ꦧꦢꦤ꧀ꦚꦏꦠꦺꦴꦤ꧀ꦱꦸꦱꦸꦠ꧀꧈ꦥꦁꦒꦃꦒꦿꦺꦴꦪꦺꦴꦏ꧀ꦱꦼꦔꦏ꧀ꦔꦶꦁꦩꦤꦶꦱ꧀꧈ꦠꦼꦧꦶꦃꦒꦺꦤ꧀ꦚꦭꦭꦤ꧈ꦮꦶꦠ꧀ꦲꦶꦔꦸꦧꦼꦂꦩꦸꦁꦱꦸꦃ꧈ꦤꦭꦶꦏꦥꦿꦗꦸꦫꦶꦠ꧀ꦭꦺꦴꦤ꧀ꦢ꧈ꦮꦶꦮꦶꦠ꧀ꦚꦼꦫꦁꦲꦶꦧꦸꦏꦺꦴꦠꦤꦶꦁꦤꦒꦫꦶ꧈ꦤꦸꦗꦸꦮꦺꦴꦤ꧀ꦠꦼꦤ꧀ꦩꦒꦼꦭꦁ꧉ |
| 4 | Kaping kalih kang prapta manggihi/ sami kagèt wit datan kinira/ Bung Tama lawan kancané/ badannya katon susut/ panggah groyok sěngak nging manis/ těbih gènnya lalana/ wit inguběr mungsuh/ nalika prajurit Londa/ wiwit nyěrang ibukotaning nagari/ nuju wontěn Magělang// |
| ꧕ | ꧄ꦚꦫꦺꦢꦺꦴꦢꦺꦴꦭ꧀ꦲꦁꦱꦭ꧀ꦏꦭꦶꦃꦫꦠꦿꦶ꧈ꦤꦸꦭꦶꦥꦿꦥ꧀ꦠꦢꦸꦠꦱꦸꦁꦥꦮꦂꦠ꧈ꦏꦁꦧꦔꦼꦠ꧀ꦲꦁꦒꦸꦒꦸꦥ꧀ꦥꦏꦺ꧈ꦧꦶꦭꦶꦃꦥꦿꦗꦸꦫꦶꦠ꧀ꦩꦸꦁꦱꦸꦃ꧈ꦮꦸꦱ꧀ꦲꦚꦼꦫꦁꦥꦫꦁꦠꦤ꧀ꦠꦼꦧꦶꦃ꧈ꦱꦏꦶꦁꦥꦫꦁꦭꦩ꧀ꦥꦃꦚ꧈ꦢꦺꦴꦢꦺꦴꦭ꧀ꦏꦁꦠꦶꦤꦸꦗꦸ꧈ꦥꦿꦩꦶꦭꦲꦺꦁꦒꦭ꧀ꦱꦩꦼꦏ꧀ꦠ꧈ꦒꦼꦒꦚ꧀ꦕꦁꦔꦤ꧀ꦱꦸꦩꦶꦁꦏꦶꦂꦩꦚ꧀ꦗꦶꦁꦮꦤꦢꦿꦶ꧈ꦏꦛꦃꦧꦫꦁꦠꦶꦤꦶꦭꦂ꧉ |
| 5 | Nyaré Dodol angsal kalih ratri/ nuli prapta duta sung pawarta/ kang bangět anggugupaké/ bilih prajurit mungsuh/ wus anyěrang Parang tan těbih/ saking Parang lampahnya/ Dodol kang tinuju/ pramila énggal saměkta/ gěgancangan sumingkir manjing wanadri/ kaṭah barang tinilar// |
| ꧖ | ꧄ꦩꦂꦒꦶꦤꦶꦥꦸꦤ꧀ꦠꦸꦲꦸꦱꦔꦼꦠ꧀ꦫꦸꦩ꧀ꦥꦶꦭ꧀꧈ꦮꦶꦠ꧀ꦮꦸꦱ꧀ꦢꦔꦸꦠꦤ꧀ꦏꦶꦤꦩ꧀ꦧꦃꦗꦭ꧀ꦩ꧈ꦩꦂꦒꦶꦮꦤꦲꦫꦤ꧀ꦱ꧀ꦭꦶꦥ꧀꧌ꦕ꧀꧈꧍꧈ꦩꦺꦃꦱꦸꦫꦸꦥ꧀ꦒꦾꦫꦮꦸꦃ꧈ꦠꦿꦸꦏꦤ꧀ꦮꦱ꧀ꦠꦲꦶꦁꦩꦒꦼꦂꦱꦫꦶ꧈ꦱꦶꦠꦶꦧꦶꦏꦏ꧀ꦏꦤ꧀ꦲꦺꦁꦒꦭ꧀꧈ꦮꦼꦁꦏꦺꦴꦤ꧀ꦱꦭꦩ꧀ꦝꦸꦱꦸꦤ꧀꧈ꦤꦸꦭꦶꦊꦉꦩ꧀ꦮꦶꦱ꧀ꦩꦤꦶꦫ꧈ꦏꦺꦴꦚ꧀ꦕꦠꦤꦶꦲꦶꦁꦏꦁꦲꦺꦱ꧀ꦠꦿꦶꦱꦔꦼꦠ꧀ꦠꦿꦩ꧀ꦥꦶꦭ꧀꧈ꦏꦂꦱꦱꦶꦤꦼꦩ꧀ꦤꦩꦚ꧉ |
| 6 | Marginipun tuhu sangět rumpil/ wit wus dangu tan kinambah jalma/ margi wana aran Slip - C/ mèh surup gya rawuh/ Trukan wasta ing Magěrsari/ siti bikakan ènggal/ wěngkon Salam ḍusun/ nuli lěrěm wismanira/ konca tani ingkang èstri sangět trampil/ Karsa Siněm namanya// |
| ꧗ | ꧄ꦮꦸꦱ꧀ꦚꦚꦫꦺꦗꦁꦏꦼꦥ꧀ꦠꦶꦒꦁꦫꦠꦿꦶ꧈ꦤꦸꦭꦶꦱꦩꦶꦧꦶꦝꦭ꧀ꦥꦶꦤ꧀ꦝꦃꦮꦶꦱ꧀ꦩ꧈ꦱꦔꦼꦠ꧀ꦝꦼꦭꦶꦏ꧀ꦥꦁꦒꦺꦴꦤ꧀ꦤꦤ꧀ꦤꦺ꧈ꦩꦼꦏꦸꦛꦫꦤ꧀ꦤꦶꦁꦝꦸꦱꦸꦤ꧀꧈ꦏ꧀ꦭꦼꦧꦼꦠ꧀ꦱꦶꦠꦶꦲꦶꦁꦩꦒꦼꦂꦱꦫꦶ꧈ꦩꦁꦒꦺꦤ꧀ꦥꦺꦴꦤ꧀ꦝꦺꦴꦏ꧀ꦥꦿꦱꦗ꧈ꦮꦼꦭꦶꦠ꧀ꦲꦠꦼꦥ꧀ꦒꦸꦒꦸꦧꦸꦒ꧀꧈ꦲꦶꦁꦏꦁꦲꦤ꧀ꦢꦂꦧꦺꦤ꧀ꦤꦶꦒꦿꦶꦪ꧈ꦠꦤꦶꦱꦼꦥꦸꦃꦲꦪꦼꦩ꧀ꦠꦼꦤ꧀ꦠꦽꦩ꧀ꦤꦢꦾꦤ꧀ꦩꦶꦱ꧀ꦏꦶꦤ꧀꧈ꦱꦸꦩꦠꦶꦂꦠꦲꦫꦤ꧀ꦚ꧉ |
| 7 | Wusnya nyaré jangkěp tigang ratri/ nuli sami biḍal pinḍah wisma/ sangět ḍělik panggonané/ Měkuṭa raning ḍusun/ klěbět siti ing Magěrsari/ manggèn ponḍok prasaja/ wělit atěp gěgubug/ ingkang andarbèni griya/ tani sěpuh ayěm těntrěm nadyan miskin/ Sumatirta arannya// |
| ꧘ | ꧄ꦥꦼꦭ꧀ꦲꦸꦩ꧀ꦥꦼꦭ꧀ꦭꦤ꧀ꦲꦤꦺꦁꦒꦸꦧꦸꦒ꧀ꦲꦭꦶꦠ꧀꧈ꦱꦸꦩꦠꦶꦂꦠꦮꦸꦮꦸꦃꦏꦝꦪꦺꦴꦃꦲꦤ꧀꧈ꦱꦢꦱꦒꦤꦼꦥ꧀ꦕꦕꦃꦲꦼ꧈ꦢ꧀ꦮꦶꦤꦪꦏꦭꦤ꧀ꦧꦸꦱꦸꦱ꧀꧈ꦥꦏ꧀ꦲꦢꦶꦩꦲꦿꦸꦥ꧀ꦩꦂꦗꦏꦸꦱ꧀ꦤꦶ꧈ꦱꦶꦱ꧀ꦮꦠꦶꦒꦱꦩꦺꦴꦢꦿ꧈ꦱꦶꦁꦒꦶꦃꦠꦸꦮꦶꦤ꧀ꦲꦺꦫꦸ꧈ꦥꦏꦂꦪꦤ꧀ꦢꦶꦢꦸꦩ꧀ꦠꦶꦤꦠ꧈ꦩꦂꦗꦝꦥꦸꦂꦏꦸꦱ꧀ꦤꦶꦥꦱꦂꦩꦲꦿꦸꦥ꧀ꦚꦸꦕꦶ꧈ꦥꦿꦱꦶꦱ꧀ꦮꦭꦩ꧀ꦥꦃꦢꦸꦠ꧉ |
| 8 | Pěl-umpělan anèng gubug alit/ Sumatirta wuwuh kaḍayohan/ sadasa ganěp cacahe/ dwi nayaka lan Bu Sus/ Pak Hadi Mahrup Marja Kusni/ siswa tiga Samodra/ Singgih tuwin Hèru/ pakaryan didum tinata/ Marja ḍapur Kusni pasar Mahrup nyuci/ pra siswa lampah duta// |
| ꧙ | ꧄ꦢꦸꦏ꧀ꦱꦩꦤꦩꦁꦱꦤꦺꦥꦕꦼꦏ꧀ꦭꦶꦏ꧀꧈ꦱꦸꦩꦠꦶꦂꦠꦠꦤꦶꦱꦔꦼꦠ꧀ꦩ꧀ꦭꦫꦠ꧀꧈ꦱꦁꦱꦫꦥꦔꦸꦫꦶꦥ꧀ꦥꦥ꧀ꦤꦺ꧈ꦠꦶꦤꦼꦝꦱꦧꦼꦤ꧀ꦥꦶꦥꦸꦤ꧀꧈ꦗꦒꦸꦁꦲꦺꦴꦫꦧꦼꦫꦱ꧀ꦠꦤ꧀ꦩꦁꦒꦶꦃ꧈ꦩꦶꦭꦥꦶꦱꦁꦧꦶꦤꦼꦛꦏ꧀꧈ꦩꦸꦁꦫꦺꦴꦤ꧀ꦭꦮꦸꦃꦲꦶꦥꦸꦤ꧀꧈ꦱꦸꦥꦿꦤ꧀ꦢꦺꦤꦺꦢꦠꦤ꧀ꦱꦩ꧀ꦧꦠ꧀꧈ꦲꦤꦫꦶꦩꦠꦶꦤꦺꦴꦩ꧀ꦥꦥꦼꦥꦚ꧀ꦕꦺꦤ꧀ꦓꦸꦱ꧀ꦡꦶ꧈ꦲꦶꦁꦏꦁꦩꦸꦂꦧꦺꦁꦧꦸꦮꦤ꧉ |
| 9 | Duk samana mangsané pacěklik/ Sumatirta tani sangět mlarat/ sangsara panguripané/ tiněḍa saběnipun/ jagung ora běras tan manggih/ mila pisang biněṭak/ mung ron lawuhipun/ suprandéné datan sambat/ anarima tinompa pěpancèn Gusti/ Ingkang Murbèng Buwana// |
| ꧑꧐ | ꧄ꦥꦿꦤꦪꦏꦉꦤꦲꦶꦁꦥꦁꦒꦭꦶꦃ꧈ꦱꦒꦼꦢ꧀ꦠꦩꦠ꧀ꦥꦶꦤꦶꦂꦱꦥꦿꦶꦪꦺꦴꦁꦒ꧈ꦏꦃꦤꦤ꧀ꦢꦺꦱꦱꦪꦼꦏ꧀ꦠꦶꦤꦺ꧈ꦥꦏ꧀ꦠꦤꦶꦒꦼꦱꦁꦔꦶꦥꦸꦤ꧀꧈ꦠꦸꦲꦸꦲꦮꦿꦠ꧀ꦥꦥꦲꦩꦼꦚ꧀ꦕꦶꦠ꧀꧈ꦥꦿꦩꦶꦭꦲꦶꦁꦏꦁꦔꦱ꧀ꦠ꧈ꦥꦼꦩꦼꦫꦶꦤ꧀ꦠꦃꦲꦒꦸꦁ꧈ꦭꦁꦏꦸꦁꦩꦭꦶꦃꦥꦩꦺꦴꦁꦥꦿꦗ꧈ꦮꦗꦶꦧ꧀ꦔꦸꦢꦶꦩꦸꦭꦾꦤꦶꦁꦤꦱꦶꦧ꧀ꦥꦏ꧀ꦠꦤꦶ꧈ꦔꦁꦏꦠ꧀ꦢꦿꦗꦠ꧀ꦠꦶꦁꦧꦺꦴꦁꦱ꧉ |
| 10 | Pra nayaka rěna ing panggalih/ sagěd tamat pinirsa priyongga/ kahnan désa sayěktiné/ pak tani gěsangipun/ tuhu awrat papa aměncit/ pramila ingkang ngasta/ pěměrintah agung/ langkung malih pamong praja/ wajib ngudi mulyaning nasib pak tani/ ngangkat drajating bongsa// |
| ꧑꧑ | ꧄ꦮꦸꦱ꧀ꦚꦊꦉꦩ꧀ꦔꦤ꧀ꦠꦺꦴꦱ꧀ꦱꦮ꧀ꦭꦱ꧀ꦲꦫꦶ꧈ꦤꦸꦭꦶꦧꦶꦝꦭ꧀ꦤꦼꦫꦸꦱ꧀ꦱꦏꦼꦤ꧀ꦭꦩ꧀ꦥꦃ꧈ꦲꦤꦸꦗꦸꦥꦛꦸꦏ꧀ꦢꦺꦱꦤꦺ꧈ꦮꦸꦱꦤꦥꦿꦥ꧀ꦠꦺꦁꦥꦛꦸꦏ꧀꧈ꦤꦩ꧀ꦥꦶꦮꦂꦠꦱꦏꦶꦁꦥꦔꦸꦁꦱꦶ꧈ꦧꦶꦭꦶꦃꦱꦕꦼꦭꦏ꧀ꦏꦶꦫ꧈ꦮꦸꦱ꧀ꦱꦩꦶꦏꦶꦤꦸꦩ꧀ꦥꦸꦭ꧀꧈ꦥꦿꦠꦮꦤ꧀ꦤꦤ꧀ꦧꦺꦴꦁꦱꦠꦾꦺꦴꦁꦲ꧀ꦮꦃ꧈ꦮꦶꦠ꧀ꦠꦤ꧀ꦭꦸꦥꦸꦠ꧀ꦧꦼꦧꦪꦩꦶꦭꦲꦤꦸꦭꦶ꧈ꦩꦸꦤ꧀ꦢꦸꦂꦒꦤ꧀ꦠꦼꦂꦒꦚ꧀ꦕꦁꦔꦤ꧀꧉ |
| 11 | Wusnya lěrěm ngantos sawlas ari/ nuli biḍal něrusakěn lampah/ anuju Paṭuk dèsané/ wusana praptèng Paṭuk/ nampi warta saking pangungsi/ bilih sacělakira/ wus sami kinumpul/ pra tawanan bongsa Tyonghwah/ wit tan luput běbaya mila anuli/ mundur Gantěr gancangan// |
| *** | |
| ꧄ꦢꦸꦂꦩ꧄ | |
| ꧑ | ꧄ꦥꦿꦥ꧀ꦠꦺꦁꦒꦤ꧀ꦠꦼꦂꦩꦁꦒꦺꦤ꧀ꦒꦿꦶꦪꦏꦩꦶꦠꦸꦮ꧈ꦏꦁꦕꦼꦛꦶꦭ꧀ꦭꦺꦏꦼꦥꦠꦶ꧈ꦥꦶꦤꦼꦠꦸꦁꦱꦢꦪ꧈ꦲꦥꦱꦸꦒꦸꦃꦲꦤ꧀ꦤꦶꦫ꧈ꦢꦭꦃꦲꦩ꧀ꦧꦺꦤ꧀ꦏꦁꦱꦶꦤꦶꦭꦶꦃ꧈ꦩꦮꦥꦱꦺꦮꦤ꧀꧈ꦭꦒꦶꦫꦶꦭꦚꦩ꧀ꦧꦸꦠ꧀ꦠꦶ꧉ |
| 1 | Praptèng Gantěr manggèn griya kamituwa/ kang cěṭilé kěpati/ pinetung sadaya/ apa suguhanira/ dalah ambèn kang sinilih/ mawa pasèwan/ lagi rila nyambuti// |
| ꧒ | ꧄ꦏ꧀ꦏꦭꦶꦃꦢꦭꦸꦚꦫꦺꦮꦶꦱ꧀ꦩꦏꦩꦶꦠꦸꦮ꧈ꦤꦸꦭꦶꦒꦾꦥꦶꦤ꧀ꦝꦃꦱꦩꦶ꧈ꦩꦶꦭꦶꦃꦱꦤꦺꦱ꧀ꦒꦿꦶꦪ꧈ꦏꦿꦩꦢꦸꦭ꧀ꦏꦫꦤ꧀ꦤꦶꦫ꧈ꦒꦿꦶꦪꦤꦺꦱꦔꦼꦠ꧀ꦲꦤ꧀ꦝꦼꦭꦶꦏ꧀꧈ꦢꦠꦤ꧀ꦏꦶꦤꦶꦫ꧈ꦧꦼꦧꦪꦲꦒꦼꦁꦥꦿꦥ꧀ꦠꦶ꧉ |
| 2 | Kalih dalu nyaré wisma kamituwa/ nuli gya pinḍah sami/ milih sanès griya/ Krama Dul karanira/ griyané sangět anḍělik/ datan kinira/ běbaya agěng prapti// |
| ꧓ | ꧄ꦢꦶꦤ꧀ꦠꦼꦤ꧀ꦏꦼꦩꦶꦱ꧀ꦥꦺꦴꦤ꧀ꦥꦶꦁꦥꦠ꧀ꦭꦶꦏꦸꦂꦠꦁꦒꦭ꧀ꦚ꧈ꦮꦸꦭꦤ꧀ꦤꦺꦥꦺꦧꦿꦸꦮꦫꦶ꧈ꦒꦒꦠ꧀ꦧꦔꦸꦤ꧀ꦲꦺꦚ꧀ꦗꦁ꧈ꦥꦏ꧀ꦥꦼꦤꦭꦤ꧀ꦱꦩꦺꦴꦢꦿ꧈ꦱꦶꦫꦩ꧀ꦩꦿꦶꦁꦏꦸꦕꦸꦂꦠꦤ꧀ꦠꦼꦧꦶꦃ꧈ꦥꦚ꧀ꦕꦶꦏꦸꦭꦶꦤ꧈ꦪꦺꦤ꧀ꦱꦶꦫꦩ꧀ꦩꦿꦸꦥꦸꦠ꧀ꦲꦺꦚ꧀ꦗꦶꦁ꧉ |
| 3 | Dintěn Kěmis Pon ping patlikur tanggalnya/ wulané Pèbruari/ gagat bangun ènjang/ Pak Pěna lan Samodra/ siram mring Kucur tan těbih/ panci kulina/ yèn siram mruput ènjing// |
| ꧔ | ꧄ꦱꦔꦼꦠ꧀ꦏꦒꦺꦠ꧀ꦩꦶꦉꦁꦲꦸꦔꦼꦭ꧀ꦭꦶꦁꦱꦚ꧀ꦗꦠ꧈ꦏꦶꦤꦶꦫꦏ꧀ăꦚ꧀ꦕꦱꦩꦶ꧈ꦗꦼꦧꦸꦭ꧀ꦧꦭꦩꦼꦁꦱꦃ꧈ꦕꦕꦃꦲꦶꦫꦱꦮꦶꦢꦏ꧀꧈ꦚꦼꦂꦧꦸꦒꦤ꧀ꦠꦼꦂꦱꦏꦶꦁꦉꦢꦶ꧈ꦲꦤꦿꦠꦱ꧀ꦮꦤ꧈ꦩꦼꦢꦭ꧀ꦩꦂꦒꦶꦏꦁꦱ꧀ꦠꦼꦥꦶ꧉ |
| 4 | Sangět kagèt mirěng ungěling sanjata/ kinira konca sami/ jěbul bala měngsah/ cacahira sawidak/ nyěrbu Gantěr saking rědi/ anratas wana/ mědal margi kang stěpi// |
| ꧕ | ꧄ꦱꦩꦶꦔꦶꦤ꧀ꦠꦶꦥ꧀ꦏꦠꦺꦴꦤ꧀ꦱꦏꦶꦁꦗꦿꦺꦴꦤꦶꦁꦮꦶꦱ꧀ꦩ꧈ꦥꦏ꧀ꦱꦸꦥꦼꦤꦭꦸꦩꦫꦶꦱ꧀꧈ꦒꦶꦤꦶꦫꦶꦁꦮꦭꦺꦴꦤ꧀ꦢ꧈ꦒꦒꦃꦠꦼꦒꦏ꧀ꦭꦩ꧀ꦥꦃꦚ꧈ꦢꦠꦤ꧀ꦩꦮꦶꦤꦺꦴꦭꦃꦤꦺꦴꦭꦶꦃ꧈ꦢꦺꦤꦺꦱꦩꦺꦴꦢꦿ꧈ꦮꦸꦱ꧀ꦠꦤ꧀ꦥꦶꦤꦁꦒꦶꦃꦩꦭꦶꦃ꧉ |
| 5 | Sami ngintip katon saking jroning wisma/ Pak Supěna lumaris/ giniring Walonda/ gagah těgak lampahnya/ datan mawi nolah-nolih/ dèné Samodra/ wus tan pinanggih malih// |
| ꧖ | ꧄ꦢꦠꦤ꧀ꦢꦔꦸꦏꦥꦶꦉꦁꦱꦏꦶꦁꦠꦼꦧꦶꦃꦲꦤ꧀꧈ꦱꦸꦁꦱꦸꦤ꧀ꦱ꧀ꦮꦫꦤꦶꦁꦧꦼꦝꦶꦭ꧀꧈ꦱꦮꦸꦱ꧀ꦚꦠꦼꦠꦺꦭ꧈ꦧꦶꦭꦶꦃꦩꦼꦁꦱꦃꦮꦸꦱ꧀ꦏꦺꦱꦃ꧈ꦏꦸꦱ꧀ꦤꦶꦢꦶꦤꦸꦠꦤꦶꦔꦭ꧀ꦭꦶ꧈ꦮꦁꦱꦸꦭ꧀ꦠꦸꦂꦮꦂꦠ꧈ꦥꦏ꧀ꦥꦼꦤꦮꦸꦱ꧀ꦔꦼꦩꦱ꧀ꦱꦶ꧉ |
| 6 | Datan dangu kapirěng saking těbihan/ sungsun swaraning běḍil/ sawusnya tětèla/ bilih měngsah wus kèsah/ Kusni dinuta ningali/ wangsul tur warta/ Pak Pěna wus ngěmasi// |
| ꧗ | ꧄ꦠꦤ꧀ꦥꦿꦕꦪꦩꦲꦿꦸꦥ꧀ꦭꦤ꧀ꦩꦂꦗꦢꦶꦤꦸꦠ꧈ꦱꦩꦶꦚꦠꦏ꧀ꦏꦼꦤ꧀ꦲꦸꦒꦶ꧈ꦩꦠꦸꦂꦪꦼꦏ꧀ꦠꦶꦚꦠ꧈ꦥꦏ꧀ꦥꦼꦤꦮꦸꦱ꧀ꦥꦿꦭꦪ꧈ꦱꦶꦤꦚ꧀ꦗꦠꦥꦶꦭꦶꦁꦏꦶꦫꦶ꧈ꦱꦢꦪꦤꦶꦫ꧈ꦥꦶꦠꦸꦏꦁꦢꦺꦤ꧀ꦥꦼꦗꦃꦲꦶ꧉ |
| 7 | Tan pracaya Mahrup lan Marja dinuta/ sami nyatakkěn ugi/ matur yěkti nyata/ Pak Pěna wus pralaya/ sinanjata piling kiri/ sadayanira/ pitu kang dèn pějahi// |
| ꧘ | ꧄ꦢꦸꦏ꧀ꦱꦩꦤꦥꦏ꧀ꦥꦼꦤꦒꦼꦩ꧀ꦲꦒꦼꦩꦶꦫ꧈ꦱꦂꦮꦕꦼꦩꦼꦁꦱꦢꦾꦺꦏꦶ꧈ꦫꦮꦶꦱ꧀ꦱꦶꦫꦥꦚ꧀ꦗꦁ꧈ꦗꦺꦁꦒꦺꦴꦠ꧀ꦧꦿꦺꦮꦺꦴꦏ꧀ꦫꦸꦁꦏꦸꦢ꧀ꦢꦤ꧀꧈ꦢꦠꦤ꧀ꦕꦶꦤꦸꦏꦸꦂꦮꦸꦱ꧀ꦭꦩꦶ꧈ꦩꦼꦁꦱꦃꦲꦔꦶꦫ꧈ꦮꦫꦺꦴꦏ꧀ꦲꦶꦁꦏꦁꦢꦺꦤ꧀ꦥꦁꦒꦶꦃ꧉ |
| 8 | Duk samana Pak Pěna gěm-agěmira/ sarwa cěměng sadyèki/ rawisira panjang/ jènggot brèwok rungkudan/ datan cinukur wus lami/ měngsah angira/ warok ingkang dèn panggih// |
| ꧙ | ꧄ꦱꦩꦶꦠꦽꦚꦸꦃꦏꦁꦠꦶꦤꦶꦭꦂꦩꦶꦗꦶꦭ꧀ꦮꦱ꧀ꦥ꧈ꦏꦺꦴꦚ꧀ꦕꦠ꧀ꦠꦤ꧀ꦩꦶꦠꦿꦪꦼꦏ꧀ꦠꦶ꧈ꦥꦏ꧀ꦥꦼꦤꦠꦤ꧀ꦧ꧀ꦭꦏ꧈ꦪꦺꦤ꧀ꦊꦁꦒꦃꦚꦤꦪꦏ꧈ꦩꦂꦒꦶꦭꦩꦸꦤ꧀ꦢꦺꦤ꧀ꦧ꧀ꦭꦏꦤ꧀ꦤꦶ꧈ꦏꦺꦮꦿꦤ꧀ꦱꦢꦪ꧈ꦠꦶꦤꦁꦏꦼꦥ꧀ꦩꦼꦁꦱꦃꦱꦩꦶ꧉ |
| 9 | Sami trěnyuh kang tinilar mijil waspa/ koncatan mitra yěkti/ Pak Pěna tan blaka/ yèn lěnggahnya nayaka/ margi lamun dèn blakani/ kèwran sadaya/ tinangkěp měngsah sami// |
| ꧑꧐ | ꧄ꦢꦸꦏ꧀ꦱꦩꦤꦥꦏ꧀ꦱꦸꦥꦼꦤꦤꦺꦏꦢ꧀ꦏꦸꦂꦧꦤ꧀꧈ꦥꦃꦭꦮꦤ꧀ꦭꦸꦲꦸꦂꦪꦼꦏ꧀ꦠꦶ꧈ꦏꦸꦱꦸꦩꦤꦶꦁꦧꦺꦴꦁꦱ꧈ꦫꦶꦭꦔꦼꦠꦺꦴꦃꦏꦼꦤ꧀ꦗꦶꦮ꧈ꦩꦿꦶꦃꦏꦮꦤ꧀ꦤꦶꦫꦧꦱꦸꦏꦶ꧈ꦲꦫꦸꦩ꧀ꦲꦱ꧀ꦩꦚ꧈ꦭꦁꦒꦼꦁꦕꦶꦤꦛꦼꦠ꧀ꦥꦱ꧀ꦛꦶ꧉ |
| 10 | Duk samana Pak Supěna nèkad kurban/ pahlawan luhur yěkti/ kusumaning bongsa/ rila ngětohkěn jiwa/ mrih kawanira basuki/ arum asmanya/ langgěng cinaṭět pasṭi// |
| ꧑꧑ | ꧄ꦥꦏ꧀ꦏꦼꦧꦪꦤ꧀ꦥꦿꦥ꧀ꦠꦲꦠꦸꦂꦥꦩꦿꦪꦺꦴꦒ꧈ꦱꦶꦒꦿꦧꦶꦝꦭ꧀ꦭꦸꦩꦫꦶꦱ꧀꧈ꦮꦶꦠ꧀ꦥꦔꦚ꧀ꦕꦩ꧀ꦩꦼꦁꦱꦃ꧈ꦱꦮꦸꦱ꧀ꦚꦚꦼꦫꦁꦭꦶꦩꦤ꧀꧈ꦧꦝꦺꦮꦁꦱꦸꦭ꧀ꦒꦤ꧀ꦠꦼꦂꦩꦭꦶꦃ꧈ꦩꦶꦭꦢꦺꦤ꧀ꦲꦺꦁꦒꦭ꧀꧈ꦩꦶꦗꦶꦭ꧀ꦩꦱꦸꦏ꧀ꦮꦤꦢꦿꦶ꧉ |
| 11 | Pak kěbayan prapta atur pamrayoga/ sigra biḍal lumaris/ wit pangancam měngsah/ sawusnya nyěrang Liman/ baḍé wangsul Gantěr malih/ mila dèn ènggal/ mijil masuk wanadri// |
| *** | |
| ꧄ꦩꦶꦗꦶꦭ꧀꧄ | |
| ꧑ | ꧄ꦥꦿꦭꦭꦤꦭꦸꦩꦼꦧꦺꦁꦮꦤꦢꦿꦶ꧈ꦏꦺꦴꦚ꧀ꦕꦥꦥꦠ꧀ꦏꦭꦺꦴꦁ꧈ꦲꦶꦁꦏꦁꦏꦭꦶꦃꦮꦸꦱ꧀ꦕꦶꦤꦿꦶꦠꦏ꧀ꦲꦏꦺ꧈ꦏꦭꦶꦃꦩꦭꦶꦃꦲꦺꦫꦸꦠꦸꦮꦶꦤ꧀ꦱꦶꦁꦒꦶꦃ꧈ꦱꦩꦶꦲꦶꦔꦸꦠꦸꦱ꧀ꦩꦿꦶꦁ꧈ꦏꦤ꧀ꦝꦁꦔꦤ꧀ꦠꦤ꧀ꦮꦁꦱꦸꦭ꧀꧉ |
| 1 | Pra lalana luměbèng wanadri/ konca papat kalong/ ingkang kalih wus cinritakaké/ kalih malih Hèru tuwin Singgih/ sami ingutus mring/ Kanḍangan tan wangsul// |
| ꧑ | ꧄ꦤꦔꦶꦁꦮꦸꦮꦸꦃꦥꦼꦩꦸꦝꦱꦠꦸꦁꦒꦶꦭ꧀꧈ꦪꦼꦏ꧀ꦠꦶꦏꦥꦶꦤꦸꦗꦺꦴꦤ꧀꧈ꦠꦏ꧀ꦱꦶꦃꦱꦶꦱ꧀ꦮꦱꦚꦠꦲꦫꦤ꧀ꦤꦺ ꧈ꦥꦏ꧀ꦄꦤꦤ꧀ꦠꦱ꧀ꦮꦲꦸꦢꦺꦤ꧀ꦠꦸꦩꦸꦠ꧀ꦠꦶ꧈ꦫꦺꦴꦩ꧀ꦧꦺꦴꦁꦔꦤ꧀ꦧꦶꦤ꧀ꦭꦼꦢꦶꦒ꧀꧈ꦥꦼꦛꦭ꧀ꦠꦤ꧀ꦮꦿꦸꦃꦢꦸꦤꦸꦁ꧉ |
| 2 | Nanging wuwuh pěmuḍa satunggil/ yěkti kapinujon/ taksih siswa Sanyata arané/ Pak Ananta swau dèn tumuti/ rombongan binlědig/ pěṭal tan wruh dunung// |
| ꧓ | ꧄ꦥꦿꦥ꧀ꦠꦺꦁꦮꦤꦱꦸꦂꦪꦮꦸꦱ꧀ꦩꦺꦃꦭꦶꦁꦱꦶꦂ꧈ꦤꦸꦭꦶꦥꦢꦺꦴꦱ꧀ꦲꦼꦁꦒꦺꦴꦤ꧀꧈ꦲꦁꦒꦭꦺꦴꦱꦺꦴꦩꦸꦁꦒꦺꦴ ꦝꦺꦴꦁꦥꦪꦺꦴꦤ꧀ꦤꦺ꧈ꦠꦤ꧀ꦲꦭꦶꦔꦤ꧀ꦲꦔꦶꦤ꧀ꦤꦺꦱꦸꦩꦿꦶꦧꦶꦠ꧀꧈ꦩꦁꦏꦺꦴꦤꦺꦴꦫꦱꦤꦶꦁ꧈ꦗꦠꦶꦤꦺꦭꦭꦏꦸ꧉ |
| 3 | Praptèng wana surya wus mèh lingsir/ nuli pados ěnggon/ anggaloso mung goḍong payoné/ tan alingan anginé sumribit/ mangkono rasaning/ jatiné lalaku// |
| ꧔ | ꧄ꦱꦧꦼꦤ꧀ꦲꦫꦶꦥꦶꦤ꧀ꦝꦃꦥꦥꦤ꧀ꦱꦩꦶ꧈ꦱꦸꦥꦪꦠꦤ꧀ꦏꦠꦺꦴꦤ꧀꧈ꦝꦲꦫꦶꦫꦩꦸꦁꦱꦉꦩ꧀ꦭꦮꦸꦃꦲꦺ꧈ꦤꦔꦿꦱꦧꦼꦒ꧀ꦗꦩꦁꦒꦶꦃꦛꦺꦮꦺꦭ꧀ꦱꦶꦗꦶ꧈ꦩꦸꦚꦸꦏ꧀ꦏꦺꦩꦫꦤ꧀ꦤꦶ/ꦲꦸꦤ꧀ꦠꦸꦁꦮꦸꦱ꧀ꦗꦶꦤꦸꦥꦸꦏ꧀꧉ |
| 4 | Saběn ari pinḍah papan sami/ supaya tan katon/ ḍaharira mung sarěm lawuhé/ ngrasa běgja manggih ṭèwèl siji/ munyuké marani/ untung wus jinupuk // |
| ꧕ | ꧄ꦗꦿꦺꦴꦤꦶꦁꦮꦤꦢꦶꦭꦭꦃꦥꦶꦤꦁꦒꦶꦃ꧈ꦱ꧀ꦮꦶꦗꦶꦲꦺꦴꦥ꧀ꦱꦶꦂꦲꦤꦺꦴꦩ꧀꧈ꦥꦏ꧀ꦥꦿꦮꦶꦫꦏꦸꦱꦸꦩꦲꦫꦤ꧀ꦤꦺ꧈ꦏꦁꦔꦸꦥꦪꦏꦼꦏꦸꦮꦠꦤ꧀ꦒꦆꦧ꧀꧈ꦲꦱꦸꦏꦥꦼꦥꦺꦭꦶꦁ꧈ꦩꦿꦶꦃꦩꦁꦒꦶꦃꦫꦲꦪꦸ꧉ |
| 5 | Jroning wana dilalah pinanggih/ swiji opsir anom/ Pak Prawirakusuma arané/ kang ngupaya kěkuwatan gaib/ asuka pěpèling/ mrih manggih rahayu// |
| ꧖ | ꧄ꦮꦸꦱ꧀ꦚꦚꦫꦺꦮꦤꦏꦭꦶꦃꦫꦠꦿꦶ꧈ꦤꦸꦤ꧀ꦠꦼꦤ꧀ꦲꦺꦁꦒꦭ꧀ꦏꦺꦴꦁꦏꦺꦴꦤ꧀꧈ꦩꦂꦗꦏꦸꦱ꧀ꦤꦶꦩꦿꦶꦁꦒꦤ꧀ꦠꦼꦂꦭꦏꦸꦤꦺ꧈ꦲꦩ꧀ꦧꦭꦺꦤ꧀ꦤꦶꦱꦧꦫꦁꦏꦁꦏꦺꦫꦶ꧈ꦧꦶꦝꦭ꧀ꦱꦶꦒꦿꦧꦭꦶ꧈ꦩꦠꦸꦂꦠꦼꦭꦱ꧀ꦱꦩ꧀ꦥꦸꦤ꧀꧉ |
| 6 | Wusnya nyaré wana kalih ratri/ nuntěn enggal kongkon/ Marja Kusni mring Gantěr lakuné/ ambalèni sabarang kang kèri/ biḍal sigra bali/ matur tělas sampun// |
| ꧗ | ꧄ꦥꦏ꧀ꦥꦿꦮꦶꦫꦤꦸꦭꦶꦱꦸꦁꦥꦮꦂꦠ꧀꧈ꦭꦤ꧀ꦢꦶꦧꦝꦺꦒꦿꦺꦴꦥꦾꦺꦴꦏ꧀꧈ꦮꦤꦲꦶꦏꦶꦭꦤ꧀ꦏꦤꦤ꧀ꦏꦼꦫꦶꦁꦔꦺ꧈ꦥꦿꦪꦺꦴꦒꦶꦤꦺꦒꦾꦧꦶꦝꦭ꧀ꦢꦺꦤ꧀ꦲꦒ꧀ꦭꦶꦱ꧀꧈ꦥꦿꦭꦭꦤꦱꦩꦶ꧈ꦔꦺꦴꦚ꧀ꦕꦠ꧀ꦠꦶꦢꦺꦤ꧀ꦒꦸꦥꦸꦃ꧉ |
| 7 | Pak Prawira nuli sung pawarti/ lan dibaḍé gropyok/ wana iki lan kanan keringé/ prayoginé gya biḍal dèn aglis/ pra lalana sami/ ngoncati dèn gupuh// |
| ꧘ | ꧄ꦮꦚ꧀ꦕꦶꦱꦺꦴꦤ꧀ꦠꦼꦤ꧀ꦢꦸꦒꦶꦥꦶꦁꦒꦶꦂꦏꦭꦶ꧈ꦱꦩꦶꦠꦸꦫꦸꦝꦼꦥꦿꦺꦴꦏ꧀꧈ꦮꦶꦠ꧀ꦠꦤ꧀ꦮꦺꦴꦤ꧀ꦠꦼꦤ꧀ꦥꦺꦴꦤ꧀ꦝꦺꦴꦏ꧀ꦏꦤ꧀ꦕꦼꦭꦏ꧀ꦏꦺ꧈ꦗꦮꦃꦥꦶꦱꦤ꧀ꦠꦼꦊꦱ꧀ꦥꦠꦶꦁꦕꦿꦶꦤ꧀ꦝꦶꦭ꧀꧈ꦱꦚꦠꦮꦶꦤꦱꦶꦱ꧀꧈ꦧꦚꦺꦴꦭ꧀ꦲꦔ꧀ꦭꦼꦭꦶꦥꦸꦂ꧉ |
| 8 | Wanci sontěn dugi pinggir kali/ sami turu ḍeprok/ wit tan wontěn ponḍokan cělaké/ jawah pisan tělěs pating crinḍil/ Sanyata winasis/ banyol anglělipur// |
| ꧙ | ꧄ꦲꦺꦚ꧀ꦗꦁꦔꦶꦥꦸꦤ꧀ꦤꦺꦁꦩꦂꦒꦶꦥꦶꦤꦁꦒꦶꦃ꧈ꦭꦫꦺꦲꦫꦤ꧀ꦱꦼꦤ꧀ꦛꦺꦴꦠ꧀꧈ꦏꦢꦶꦗꦭ꧀ꦩꦲꦭꦱꦤ꧀ꦫꦸꦥꦤꦺ꧈ꦠꦔꦤ꧀ꦏꦤꦤ꧀ꦥꦸꦠꦸꦁꦏꦼꦤꦩꦶꦩꦶꦱ꧀꧈ꦏꦮꦼꦭꦱ꧀ꦱꦼꦤ꧀ꦱꦩꦶ꧈ꦭꦶꦤꦶꦭꦤ꧀ꦲꦁꦒꦧꦸꦁ꧉ |
| 9 | Ènjangipun nèng margi pinanggih/ laré aran Sěnṭot/ kadi jalma alasan rupané/ tangan kanan putung kěna mimis/ kawělasěn sami/ linilan anggabung// |
| ꧑꧐ | ꧄ꦱꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦥꦿꦥ꧀ꦠꦺꦁꦭꦸꦔꦸꦂꦲꦶꦁꦒꦶꦭ꧀꧈ꦏꦠꦶꦱ꧀ꦱꦼꦤ꧀ꦝꦫꦺꦴꦝꦺꦴꦒ꧀꧈ꦗꦸꦫꦁꦗꦼꦫꦺꦴꦲꦶꦁꦏꦤꦤ꧀ꦏꦶꦫꦶꦤꦺ꧈ꦲꦂꦒꦥꦱꦂꦲꦫꦤ꧀ꦤꦶꦁꦏꦁꦲꦂꦢꦶ꧈ꦕꦏꦼꦠ꧀ꦥꦸꦚ꧀ꦕꦏ꧀ꦮꦶꦭꦶꦱ꧀꧈ꦭꦶꦩꦱ꧀ꦏꦺꦴꦕꦥ꧀ꦥꦶꦥꦸꦤ꧀꧉ |
| 10 | Sontěnipun praptèng lungur inggil/ katisěn ḍaroḍog/ jurang jěro ing kanan kiriné/ arga Pasar araning kang ardi/ cakět puncak Wilis/ Limas kocapipun // |
| ꧑꧑ | ꧄ꦔꦚ꧀ꦕꦶꦏ꧀ꦮꦼꦔꦶꦲꦶꦁꦠꦼꦧꦶꦃꦏꦲꦺꦏ꧀ꦱꦶ꧈ꦢꦶꦭꦃꦥꦠꦶꦁꦏꦽꦭꦺꦴꦥ꧀꧈ꦭꦩ꧀ꦥꦸꦭꦺꦏ꧀ꦠꦿꦶꦱ꧀ꦠꦶꦁꦏ꧀ꦭꦼꦥꦾꦸꦂꦱꦺꦴꦫꦺꦴꦠ꧀ꦠꦺ꧈ꦏꦫꦔꦽꦗꦭꦤ꧀ꦏꦶꦛꦏꦼꦝꦶꦫꦶ꧈ꦱꦶꦤꦮꦁꦱꦶꦁꦉꦢꦶ꧈ꦱꦔꦼꦠ꧀ꦲꦺꦭꦺꦴꦏ꧀ꦏꦶꦥꦸꦤ꧀꧉ |
| 11 | Ngancik wěngi ing těbih kaèksi/ dilah pating krělop/ lampu lèktris ting klěpyur soroté/ Karangrěja lan kiṭa Kěḍiri/ sinawang sing rědi/ sangět elokipun// |
| ꧑꧒ | ꧄ꦭꦩ꧀ꦥꦃꦲꦶꦫꦉꦏꦲꦺꦴꦱ꧀ꦏꦼꦥꦠꦶ꧈ꦲꦔꦼꦭꦏ꧀ꦲꦔꦺꦴꦫꦺꦴꦁ꧈ꦱꦢꦶꦤꦩꦸꦥꦸꦠ꧀ꦠꦤ꧀ꦏꦩ꧀ꦧꦺꦴꦤ꧀ꦔꦺꦴꦩ꧀ꦧꦺ꧈ꦔꦤ꧀ꦠꦶꦒ꧀ꦭꦒꦃꦏ꧀ꦭꦏꦺꦴꦤ꧀ꦢꦺꦤ꧀ꦠꦼꦩꦃꦲꦶ꧈ꦏꦼꦩ꧀ꦭꦏꦭꦤ꧀ꦮꦸꦤꦶ꧈ꦏꦁꦏꦶꦤꦂꦪꦔꦶꦤꦸꦩ꧀꧉ |
| 12 | Lampahira rěkaos kěpati/ angělak angorong/ sadina muput tan kambon ngombé/ nganti glagah klakon dèn těmahi/ kěmlaka lan wuni/ kang kinarya nginum// |
| ꧑꧓ | ꧄ꦤꦔꦶꦁꦱꦸꦏꦸꦂꦥꦿꦭꦭꦤꦪꦼꦏ꧀ꦠꦶ꧈ꦲꦶꦔꦪꦺꦴꦩꦤ꧀ꦩꦤꦺꦴꦤ꧀꧈ꦢꦠꦤ꧀ꦏꦿꦲꦺꦴꦱ꧀ꦒꦶꦫꦶꦱ꧀ꦥꦁꦒꦭꦶꦲꦺ꧈ꦱꦶꦩꦱꦮꦼꦂꦕꦺꦭꦺꦁꦠꦤ꧀ꦩꦿꦁꦒꦸꦭ꧀ꦭꦶ꧈ꦩ꧀ăꦁꦏꦮꦸꦱ꧀ꦏꦮꦂꦠꦶ꧈ꦏꦛꦃꦱꦶꦩꦤꦶꦥꦸꦤ꧀꧉ |
| 13 | Nanging sukur pra lalana yěkti/ ingayoman Manon/ datan kraos giris panggalihé/ sima sawěr cèlèng tan mrangguli/ măngka wus kawarti/ kaṭah simanipun // |
| ꧑꧔ | ꧄ꦗꦿꦺꦴꦤꦶꦁꦮꦤꦗꦁꦏꦼꦥ꧀ꦥꦶꦠꦸꦁꦫꦠꦿꦶ꧈ꦥꦿꦭꦭꦤꦩꦶꦪꦺꦴꦱ꧀꧈ꦢꦸꦒꦶꦝꦸꦏꦸꦃꦒꦸꦮꦩꦤꦸꦏ꧀ꦫꦤ꧀ꦤꦺ꧈ꦠꦸꦩꦸꦠ꧀ꦏꦿꦗꦤ꧀ꦏꦫꦁꦤ꧀ăꦁꦏꦢꦺꦱꦶ꧈ꦤꦸꦭꦶꦱꦩꦶꦏꦩ꧀ꦥꦶꦂ꧈ꦭꦸꦫꦃꦮꦶꦱ꧀ꦩꦤꦶꦥꦸꦤ꧀꧉ |
| 14 | Jroning wana jangkěp pitung ratri/ pra lalana miyos/ dugi ḍukuh Guwamanuk rané/ tumut krajan Karangnăngka dèsi/ nuli sami kampir/ lurah wismanipun// |
| ꧑꧕ | ꧄ꦧꦥꦏ꧀ꦭꦸꦫꦃꦲꦠꦸꦂꦥꦿꦩꦪꦺꦴꦒꦶ꧈ꦥꦿꦭꦭꦤꦩꦁꦒꦺꦴꦤ꧀꧈ꦩꦒꦼꦂꦱꦫꦶꦏꦁꦝꦼꦭꦶꦏ꧀ꦥꦥꦤ꧀ꦤꦺ꧈ꦤꦸꦭꦶꦧꦶꦝꦭ꧀ꦊꦉꦩ꧀ꦩꦒꦼꦂꦱꦫꦶ꧈ꦒꦿꦶꦪꦤꦺꦩꦸꦫꦢꦶ꧈ꦠꦤ꧀ꦩꦶꦁꦏꦸꦂꦠꦸꦂꦱꦺꦴꦏꦸꦂ꧉ |
| 15 | Bapak lurah atur pramayogi/ pra lalana manggon/ Magěrsari kang ḍělik papané/ nuli biḍal lěrěm Magěrsari/ griyané Muradi/ tan mingkur tur sokur// |
Post a Comment