| ꧁꧂ |
| ꧄ꦝꦤ꧀ꦝꦁꦒꦸꦭ꧄ |
| ꧑ |
꧄ꦤꦶꦲꦤ꧀ꦢꦺꦴꦤ꧀ꦤꦶꦁꦔꦸꦭꦸꦤ꧀ꦩꦤꦸꦭꦠ꧀ꦱꦿꦶ꧈ꦩꦿꦶꦁꦱꦂꦏꦫꦩꦩꦿꦶꦃꦩꦩꦂꦢꦮ꧈ꦠꦾꦱ꧀ꦮꦶꦒꦼꦤꦥꦚ꧀ꦗꦸꦠꦤ꧀ꦤꦺ꧈ꦗꦸꦮꦼꦠ꧀ꦱꦶꦭꦂꦗꦺꦁꦠꦸꦮꦸꦃ꧈ꦮꦲꦤꦤ꧀ꦤꦶꦁꦏꦲꦤꦤ꧀ꦗꦠꦶ꧈ꦱꦸꦗꦤꦥꦫꦩꦴꦂꦠ꧈ꦮꦶꦠꦤ꧀ꦤꦶꦁꦠꦸꦩꦸꦮꦸꦃ꧈ꦮꦶꦤ꧀ꦤꦔꦸꦤ꧀ꦤꦶꦁꦏꦁꦱꦱ꧀ꦩꦶꦠ꧈ꦒꦶꦤꦸꦥꦶꦠꦲꦶꦁꦏꦮꦶꦫꦺꦃꦧꦶꦩꦱꦸꦕꦶ꧈ꦮꦶꦤꦔꦸꦤ꧀ꦭꦮꦤ꧀ꦗꦂꦮ꧉ |
| 1 |
Nihan doning ngulun manulat sri/ mring sarkara mamrih mamardawa/ tyas wigěna panjutané/ juwět silarjèng tuwuh/ wahananing kahanan jati/ sujana paramarta/ witaning tumuwuh/ winangun ingkang sasmita/ ginupita ing kawi rèh Bimasuci/ winangun lawan jarwa// |
| ꧒ |
꧄ꦮꦽꦏꦺꦴꦝꦫꦢꦸꦏ꧀ꦥꦸꦫꦸꦲꦶꦠꦩꦿꦶꦁ꧈ꦝꦚꦁꦣꦸꦂꦟꦏꦶꦤꦺꦤ꧀ꦔꦸꦥꦪꦲ꧈ꦠꦺꦴꦪꦲꦶꦁꦏꦁꦤꦸꦕꦺꦏ꧀ꦲꦏꦺ꧈ꦩꦫꦁꦱꦫꦶꦫꦤꦶꦥꦸꦤ꧀꧈ꦮꦽꦏꦺꦴꦝꦫꦩꦤ꧀ꦠꦸꦏ꧀ꦮꦼꦮꦂꦠꦶ꧈ꦩꦫꦶꦁꦤꦒꦿꦶꦔꦩꦂꦡ꧈ꦥꦩꦶꦠ꧀ꦏꦢꦁꦱꦼꦥꦸꦃ꧈ꦱꦶꦫꦦꦿꦨꦸꦪꦸꦝꦶꦱ꧀ꦛꦶꦫ꧈ꦏꦁꦥꦫꦫꦶꦱꦢꦪꦤꦸꦗꦸꦩꦉꦁꦔꦶ꧈ꦲꦤꦺꦁꦔꦂꦱꦤꦶꦁꦫꦏ꧉ |
| 2 |
Wrěkoḍara duk puruhita mring/ ḍanyang Durna kinèn ngupayaa/ toya ingkang nucèkaké/ marang sariranipun/ Wrěkoḍara mantuk wěwarti/ maring nagri Ngamarta/ pamit kadang sěpuh/ sira Prabu Yuḍisṭira/ kang para ri sadaya nuju marěngi/ anèng ngarsaning raka// |
| ꧓ |
꧄ꦲꦂꦪꦯꦺꦟꦩꦠꦸꦂꦲꦶꦁꦫꦏꦗꦶ꧈ꦭꦩꦸꦤ꧀ꦲꦂꦱꦏꦺꦱꦃꦩꦩꦿꦶꦃꦠꦺꦴꦪ꧈ꦢꦺꦤ꧀ꦤꦶꦁꦒꦸꦫꦸꦥꦶꦠꦸꦢꦸꦃꦲꦺ꧈ꦱꦿꦶꦣꦂꦩꦦꦸꦠꦿꦔꦸꦔꦸꦤ꧀꧈ꦲꦩꦶꦪꦂꦱꦲꦠꦸꦂꦫꦶꦁꦔꦫꦶ꧈ꦕꦶꦤ꧀ꦤꦶꦥ꧀ꦠꦥꦿꦥ꧀ꦠꦺꦁꦧꦪ꧈ꦟꦫꦺꦟ꧀ꦢꦿꦩꦔꦸꦤ꧀ꦏꦸꦁ꧈ꦢꦾꦤ꧀ꦱꦠꦿꦶꦪꦣꦟꦚ꧀ꦗꦪ꧈ꦩꦠꦸꦂꦤꦼꦩ꧀ꦧꦃꦲꦶꦁꦫꦏꦯꦿꦶꦤꦫꦥꦠꦶ꧈ꦥꦸꦤꦶꦏꦠꦤ꧀ꦱꦏꦺꦕ꧉ |
| 3 |
Arya Sèna matur ing raka ji/ lamun arsa kèsah mamrih toya/ dèning guru pituduhé/ Sri Darmaputra ngungun/ amiyarsa aturing ari/ cinipta praptèng baya/ narèndra mangun kung/ dyan satriya Dananjaya/ matur němbah ing raka sri narapati/ punika tan sakèca// |
| ꧔ |
꧄ꦲꦶꦁꦒꦶꦃꦱꦩ꧀ꦥꦸꦤ꧀ꦥꦢꦸꦏꦭꦶꦭꦤ꧀ꦤꦶ꧈ꦫꦪꦶꦢꦊꦩ꧀ꦏꦺꦱꦃꦲꦺꦥꦸꦤ꧀ꦤꦶꦏ꧈ꦧꦺꦴꦠꦼꦤ꧀ꦱꦏꦺꦕꦫꦲꦺꦴꦱ꧀ꦱꦺ꧈ꦲꦂꦪꦏꦭꦶꦃꦮꦺꦴꦠ꧀ꦱꦤ꧀ꦠꦸꦤ꧀꧈ꦲꦶꦁꦒꦶꦃꦱꦩ꧀ꦥꦸꦤ꧀ꦠꦸꦮꦤ꧀ꦭꦶꦭꦤ꧀ꦤꦶ꧈ꦮꦠꦏ꧀ꦫꦏꦥꦢꦸꦏ꧈ꦔꦱ꧀ꦠꦶꦤꦥꦸꦏꦸꦭꦸꦤ꧀꧈ꦏꦂꦪꦩꦔꦺꦟ꧀ꦢꦿꦱꦁꦱꦫ꧈ꦉꦰꦶꦣꦸꦂꦟꦒꦶꦤꦸꦧꦼꦭ꧀ꦩꦸꦫꦶꦃꦔꦥꦸꦱ꧀ꦱꦶ꧈ꦱꦶꦂꦤꦤꦶꦁꦥꦿꦥꦟ꧀ꦝꦮ꧉ |
| 4 |
Inggih sampun paduka lilani/ rayi dalěm kèsahé punika/ botěn sakèca raosé/ arya kalih wotsantun/ inggih sampun tuwan lilani/ watak raka paduka/ Ngastina pukulun/ karya mangèndra sangsara/ Rěsi Durna ginuběl murih ngapusi/ sirnaning pra panḍawa// |
| ꧕ |
꧄ꦮꦽꦏꦺꦴꦝꦫꦩꦶꦪꦂꦱꦤꦲꦸꦫꦶ꧈ꦲꦶꦁꦱꦸꦤ꧀ꦩꦺꦴꦁꦱꦏꦼꦤ꧀ꦤꦲꦢꦺꦤ꧀ꦲꦩ꧀ꦥꦃ꧈ꦩꦠꦶꦪꦔꦸꦩꦸꦂꦏꦸꦝꦺꦮꦺ꧈ꦮꦺꦴꦁꦤꦼꦢꦾꦩꦿꦶꦃꦥꦶꦤꦸꦠꦸꦱ꧀꧈ꦥꦤꦸꦁꦒꦭ꧀ꦭꦺꦃꦪꦁꦩꦲꦱꦸꦕꦶ꧈ꦲꦂꦪꦯꦺꦟꦱꦏ꧀ꦱꦤ꧈ꦏꦭꦺꦥꦠ꧀ꦱꦸꦩꦼꦩ꧀ꦥꦿꦸꦁ꧈ꦯꦿꦶꦟꦫꦺꦟ꧀ꦢꦿꦪꦸꦝꦶꦱ꧀ꦛꦶꦫ꧈ꦩꦶꦮꦃꦲꦫꦶꦏꦠꦶꦒꦔꦸꦔꦸꦤ꧀ꦠꦤ꧀ꦱꦶꦥꦶ꧈ꦭꦶꦂꦠꦶꦤ꧀ꦤꦼꦧꦏ꧀ꦩꦺꦴꦁꦠꦸꦤ꧀ꦤ꧉ |
| 5 |
Wrěkoḍara miyarsa nauri/ ingsun măngsa kěnaa dèn ampah/ mati ya ngumurku ḍèwé/ wong nědya mrih pinutus/ panunggalé Hyang Maha Suci/ Arya Sèna saksana/ kalèpat suměmprung/ Sri Narèndra Yuḍisṭira/ miwah ari katiga ngungun tan sipi/ lir tiněbak mong tuna// |
| ꧖ |
꧄ꦠꦤ꧀ꦮꦶꦤꦂꦤꦏꦁꦏꦫꦶꦥꦿꦶꦃꦲꦠꦶꦤ꧀꧈ꦏꦮꦸꦮꦸꦱꦭꦩ꧀ꦥꦲꦶꦫꦯꦺꦟ꧈ꦠꦤ꧀ꦥꦮꦢꦾꦲꦩꦸꦁꦝꦺꦮꦺ꧈ꦩꦸꦁꦧꦗꦿꦱꦶꦟ꧀ꦝꦸꦁꦫꦶꦮꦸꦠ꧀꧈ꦲꦩ꧀ꦧꦼꦧꦼꦤ꧀ꦤꦼꦂꦩꦸꦫꦁꦲꦶꦁꦩꦂꦒꦶ꧈ꦥꦿꦲꦫꦩꦸꦁꦒꦺꦁꦔꦂꦱ꧈ꦒꦺꦴꦫꦫꦺꦃꦒꦸꦩꦸꦫꦸꦃ꧈ꦏꦒꦾꦠ꧀ꦩꦶꦫꦶꦱ꧀ꦮꦺꦴꦁꦥꦢꦺꦱꦤ꧀꧈ꦏꦁꦏꦲꦩ꧀ꦧꦃꦏꦁꦏꦥꦿꦁꦒꦸꦭ꧀ꦝꦺꦴꦝꦺꦴꦏ꧀ꦲꦗꦿꦶꦃ꧈ꦲꦤ꧀ꦝꦼꦥꦺꦱ꧀ꦤꦼꦩ꧀ꦧꦃꦤꦼꦩ꧀ꦧꦃ꧉ |
| 6 |
Tan winarna kang kari prihatin/ kawuwusa lampahira Sèna/ tanpa wadya amung ḍèwé/ mung bajra sinḍung riwut/ amběběněr murang ing margi/ prahara munggèng ngarsa/ gora rèh gumuruh/ kagyat miris wong padèsan/ kang kaambah kang kapranggul ḍoḍok ajrih/ anḍěpès němbah-němbah// |
| ꧗ |
꧄ꦏꦛꦃꦥꦱꦼꦒꦃꦝꦠꦤ꧀ꦠꦶꦤꦺꦴꦭꦶꦃ꧈ꦭꦁꦏꦸꦁꦲꦢꦽꦁꦥꦿꦥ꧀ꦠꦺꦁꦏꦸꦫꦸꦱꦺꦠꦿ꧈ꦩꦂꦒꦒꦼꦁꦏꦩ꧀ꦧꦃꦭꦩ꧀ꦥꦃꦲꦺ꧈ꦒ꧀ꦭꦶꦱ꧀ꦱꦶꦁꦭꦩ꧀ꦥꦃꦲꦶꦫꦱꦿꦸ꧈ꦒꦥꦸꦫꦒꦼꦁꦩꦸꦁꦒꦸꦭ꧀ꦏꦲꦺꦏ꧀ꦱꦶ꧈ꦥꦸꦕꦏ꧀ꦩꦸꦠꦾꦫꦩꦸꦚ꧀ꦕꦂ꧈ꦱꦁꦏꦶꦁꦢꦺꦴꦃꦔꦸꦔꦸꦮꦸꦁ꧈ꦭꦶꦂꦏꦸꦩꦼꦩ꧀ꦧꦂꦫꦶꦁꦧꦱ꧀ꦏꦫ꧈ꦏꦸꦤ꧀ꦤꦼꦁꦮꦲꦸꦏꦁꦩꦏ꧀ꦱꦶꦃꦮꦺꦴꦤ꧀ꦠꦼꦤ꧀ꦲꦶꦁꦩꦂꦒꦶ꧈ꦮꦸꦮꦸꦱ꧀ꦱꦼꦤ꧀ꦲꦶꦁꦔꦱ꧀ꦠꦶꦤ꧉ |
| 7 |
Kaṭah pasěgah ḍatan tinolih/ langkung adrěng praptèng Kurusètra/ marga gěng kambah lampahé/ glising lampahira sru/ gapura gěng munggul kaèksi/ pucak mutyara muncar/ sangking doh ngunguwung/ lir kuměmbaring baskara/ kuněng wau kang maksih wontěn ing margi/ wuwusěn ing Ngastina// |
| ꧘ |
꧄ꦦꦿꦧꦸꦯꦸꦪꦸꦢꦤꦲꦤꦶꦩ꧀ꦧꦭ꧀ꦭꦶ꧈ꦝꦚꦁꦣꦸꦂꦟꦥꦿꦥ꧀ꦠꦲꦶꦁꦗꦿꦺꦴꦥꦸꦫ꧈ꦟꦠꦺꦁꦩꦤ꧀ꦢꦿꦏꦱꦉꦁꦔꦺ꧈ꦦꦿꦧꦸꦔꦮꦺꦴꦁꦒꦠꦸꦩꦸꦠ꧀꧈ꦥꦿꦱꦼꦤ꧀ꦠꦤꦲꦤ꧀ꦢꦼꦭ꧀ꦭꦶꦁꦮꦺꦰ꧀ꦛꦶ꧈ꦥꦿꦱꦩꦶꦲꦶꦁꦔꦤ꧀ꦢꦶꦏꦤ꧀꧈ꦩꦫꦁꦗꦿꦺꦴꦏꦝꦠꦸꦤ꧀꧈ꦮꦺꦴꦁꦔꦒꦸꦁꦲꦶꦁꦱꦶꦤ꧀ꦢꦸꦯꦺꦟ꧈ꦗꦪꦗꦠꦿꦩꦶꦮꦃꦑꦶꦲꦂꦪꦯꦁꦏꦸꦤ꧀ꦤꦶ꧈ꦨꦶꦱ꧀ꦩꦩꦾꦁꦢꦿꦸꦯꦱꦤ꧉ |
| 8 |
Prabu Suyudana animbali/ ḍanyang Durna prapta ing jro pura/ natèng Mandraka sarěngé/ Prabu Ngawăngga tumut/ pra sěntana anděling wèsṭi/ prasami ingandikan/ marang jro kaḍatun/ wong agung ing Sindusèna/ Jayajatra miwah Ki Arya Sangkuni/ Bisma myang Drusasana// |
|
|
꧋ꦲꦏ꧀ꦲꦶꦂꦚꦏꦼꦠꦼꦩꦸꦲꦂꦠꦏꦫꦸꦤ꧀꧉
ReplyDeleteꦠꦼꦫꦶꦩꦏꦱꦶꦃꦱꦸꦣꦃꦧꦼꦁꦏꦸꦚ꧀ꦗꦸꦁ
Delete